БИШКЕК, 3-фев. — Sputnik. Мурдагы күйөөсү тарабынан кулак-мурду кесилген Асел Ногойбаева соттолуучуга берилген жаза боюнча баракчасына билдирүү жазды.
Жабырлануучу соттун чечими чыккан соң көп ыйлап, өзүнө келе албай жүргөнүн белгилеген. Ошондой эле ал мурдагы жолдошу Азамат Эстебесов анын артынан аңдып, кол салып, сабап, коркутуп жүргөндө бир нече жолу милицияга кайрылганын, бирок эч кандай жыйынтык чыкпаганына токтолгон.
"Ага 20 жылга абакка кесүү чечимин чыгарды. Бул мени өлтүрбөгөнү үчүн берилген мөөнөт. Чындыгында ал мени өлтүрүү максатында келген. Менин көзүмдү чукуп саларда үйгө милиция кызматкерлери кирип келишкен. Адвокат менен байланыштым. Ал сот мыйзамга таянуу менен Эстебесовду өмүр бою камакка алуу чечимин чыгара албаганын түшүндүрдү. Соттор, прокурорлор аны катуу жазалоо чечимин чыгаргысы келсе да, мыйзам зордукчул тарапта экен", – деген Ногойбаева.
Ал ошондой эле паранойядан жабыркап жатканын, уйкусу тынч эместигин кошумчалап, эки баласы менен өлкөдө калуу ага коркунучтуу экенин белгилеген. Буга күйөөсү мунапыс менен чыкса кайрадан кол салат деген жүйөнү келтирген.
"Мен көзүмдү жумгандан, уктагандан корком. Себеби түшүмдө ошол күнгө кайтып барам. Балким Кыргызстандан чыгып кетсем тынч уктай алам", – деп жазылат жабырлануучунун билдирүүсүндө.
Эске салсак, Азамат Эстебесовго карата 26-январда Сокулук райондук сотунун өкүмү чыккан. Ага ылайык, Эстебесов 20 жылга эркинен ажыратылып, мурдагы аялына компенсация катары 2 миллион сом, мамлекетке айып пул катары 80 миң сом төлөп берүүгө милдеттендирилген. Ал эми жабыркаган келин жана анын жакындары айыпталуучуну өмүр бою камакка алууну суранышкан.
Окуя тууралуу: 20-сентябрда Бишкектин чет жакасындагы Селекция айылында жашаган 36 жаштагы аял өз үйүндө бычакталып, кулак-мурду кесилген. Бул кылмышка шектелип анын 39 жаштагы мурдагы күйөөсү кармалып, тергөө абагына киргизилген. Жабырланган аялдын кескиленген органдарын калыбына келтирүүгө түркиялык пластикалык хирург акысыз жардам убадалаган. Ага бир нече оор жана кымбат операция жасоо талап кылынары айтылган эле. 27-сентябрда Чүй облустук соту райондук соттун "Зордуктоо" боюнча чечимин өзгөртүп, келинди кордогон кишини 8 жылга соттогон.