БИШКЕК, 2-фев. — Sputnik. ТЭЦтин аймагына өзгөчө кырдаал режими киргизилди. Бул тууралуу ӨКМ башчысы Бообек Ажикеев брифинг учурунда билдирди.
Анын айтымында, жеринде штаб түзүлүп, курамына тиешелүү органдардын кызматкерлери кирди.
"Шаардагы үйлөрдө температура сакталып жатат. Электр энергиясы үзгүлтүксүз берилип турмакчы. Өзгөчө кырдаал режими ТЭЦте гана жарыяланды. Бишкекке мындай режим киргизүүгө эч кандай негиз жок", — деген Ажикеев.
Ал Камчыбек Ташиевдин тапшырмасы менен ТЭЦтеги авария диверсия болушу мүмкүн деген версия да каралып жатканын белгилеген.
"Түнкү саат 3:00дө бир нече ирет жарылуу болгон. Техногендик версияны эске алганда техникалык мүчүлүштүк да болушу мүмкүн", — деди Ажикеев.
Энергетика министринин орун басары Насипбек Керимов кырсык ТЭЦтин эски бөлүгүндө болгонун айтып, кышка даярдык учурунда ал жакта текшерүү болгонун белгилеген.
"Эски бөлүктөгү буу казандардын эскилиги жеткен. 1960-70-жылдары эксплуатацияга берилген. Алар өз мөөнөтүн аткарып бүткөн. Кышка даярдыктар жакшы болчу. Буу казан жарылган жок, жарылуу анын көмөкчү жабдуусунда болду го деп ойлоп жатабыз", — деген Керимов.
Белгилей кетсек, ТЭЦте жарылуу 2-февралга караган түнү болгон. Авария боюнча Sputnik Кыргызстан агенттиги тексттик трансляция жүргүзүүдө. Ошондой эле ыкчам маалыматтарды Телеграм-каналдан да окуп турсаңыздар болот.