БИШКЕК, 1-фев. — Sputnik. Бириккен Улуттар Уюмунун (БУУ) эл аралык соту Украинанын Донбасс менен Крым боюнча конвенциялар сакталган жок деп Россияга койгон доосун четке акты. Бул туурасында инстанциянын төрагасы Жоан Донохью билдиргенин РИА Новости жазды.
Кеп Киев 2017-жылы берген арыз туурасында жүрүп жатат. Анда Россиянын Донбасстагы кадамы Террорчулукту финансылоого каршы күрөшүү боюнча эл аралык конвенцияны, ал эми Крымдагы аракети Расалык дискриминациянын бардык формаларын жоюу боюнча эл аралык конвенцияны бузуп жатат деп таанууну талап кылган.
Судья Донбасс жаатында Москва өзүнүн милдеттенмелеринин алкагында конвенциядагы жоболордун көбүн сактагандыгын белгилеген. Сөз 10, 12 жана 18-беренелер (биринчи пункт) боюнча жүрүүдө. Аны менен катар эле сот доо артылган тарапта бир гана нерсе, тагыраагы, 9-берененин биринчи пункту сакталбай калганы айтылган.
Документте өзүнө керектүү маалыматты алгандан кийин ошол өлкөнүн аймагында кылмыш жасашы ыктымал болгон адамдардын аракеттерин иликтөө боюнча чараларды көрүү жөнүндө белгиленет.
Крым темасына келсек, сот мында да Киевдин даттануусунун көбүн четке каккан. Донохьюнун айтымында, Россия 2014-жылы жарым аралда мектептерде украин тилинде билим берүү системасын уюштуруп берген, бирок муну менен беренедеги Расалык дискриминациянын бардык формаларын жоюу конвенциясынын 2-беренесинин биринчи параграфын жана 5-беренесин бузган.
Бул конвенциядагы 2-беренеге ылайык, мүчө өлкөлөр расалык кемсинтүүнү айыптап, андан сырткары, расалык дискриминациянын бардык формаларын жоюп жана болгон аракетин расалардын ортосунда өз ара ынтымак, ырашкерликти жаратуу саясатын жүргүзүүгө жумшоо милдетин алат.
5-беренеде мамлекет расалык кемсинтип-басынтууга тыюу салып, жоюу жана ар бир адамдын мыйзам алдындагы тең укуктуулугун камсыздоого милдеттүү экени айтылат.
Сот Украинанын калган дооматтарын канааттандырган эмес.
Бир аз кечирээк РФ ТИМи бул чечимге кайрылган билдирүү жасап, БУУнун Эл аралык соту Киевдин жетелөөсүндө калбаганын жана Москваны "агрессор", ДЭР менен ЛЭРди "террордук уюм" деп таануудан принципиалдуу түрдө баш тартканын кабарлады.
Москва Киев таккан күнөөлөрдү бир нече ирет четке кагып, бардык аймактарында адамдардын укугунун бузулбай сакталышына кепилдик берерин жана аларды мындан ары да коргой турганын айтып келет. Россия бийлиги муну менен катар украиналык аскерлер менен улутчул батальондор 2014-жылдан тарта Донбасстын карапайым элин аткылап келгенине эл аралык коомчулуктун көңүлүн бурууга бир нече ирет аракет кылган.