БИШКЕК, 31-янв. — Sputnik. 740 миң долларды жок кылган деп айыпталган Башкы прокуратуранын тергөө башкармалыгынын бөлүм башчысы Рустам Абдурасулов үй камагына чыгарылды. Бул тууралуу башкы прокурор Курманкул Зулушев маалымат жыйын учурунда билдирди.
Анын айтымында, Абдурасулов коротуп койгон акча россиялык ишкерлерге таандык болгон.
"Биздин тергөө башкармалыгы "Керемет банк" боюнча кылмыш ишин иликтеди. 24 миллион долларга чукул каражат чыгарылып кеткен. Бул акча россиялык ишкерлерге таандык болгон. Абдурасулов жабыркагандарга акчаны тил кат жана видеожазуу аркылуу кайтарып берген. Айрымдарынын каражаты Дубай, Түркияга жөнөтүлгөн. Бирок акыркы 700 миң долларды ал банкка которбой, жабыркагандарга бербей, сейфке сактап койгон", — деген Зулушев.
Башкы прокурор кийинки күнү Абдурасуловдун бир тууганы келип бардык сумманы төлөп кеткенин белгилеген.
"Башында биз бул акчаны букмекерде ойноп уттуруп жиберди деп ойлоп жатканбыз. Бирок кийинки күнү бир тууганы акчаны кантип алып келмек эле? Букмекерлер мынча акчаны кайтарып берип коймок эмес. Тергөө бүтө элек, Абдурасулов өзү каражатты кайда сарптап, сейфтен эмнеге алып чыкканын айта элек", — деген башкы прокурор.
Эске салсак, Башкы прокуратуранын тергөө башкармалыгынын бөлүм башчысы 2023-жылдын сентябрь айында кармалган.
Кылмыш иштери боюнча келтирилген зыяндын ордун толтуруу катары келип түшкөн акчаны инвентаризациялай келгенде каражат жетпей калган. Ошол эле күнү Аскер прокуратурасы бул факт боюнча иш козгоп, Кылмыш-жаза процессуалдык кодексинин 97-беренесинин негизинде Абдурасулов кармалган. Акча толугу менен ордуна коюлган.