БИШКЕК, 29-янв. — Sputnik. Транспорт жана коммуникациялар министрлигинде, анын ведомстволук бөлүмдөрүндө 1 миллиард 251 миллион 455,6 миң сомдук каржылык тартип бузуулар аныкталды. Бул тууралуу Эсеп палатасынын маалымат кызматы кабарлады.
Палатанын отурумунда министрликтин 2021-2022-жылдарга карата бюджетинин аткарылышына жүргүзүлгөн аудиттин отчету каралган. Натыйжада бир катар каржылык тартип бузуулар аныкталган. Алар:
бюджетти аткаруудагы бузуулар жана кемчиликтер – 366 миллион 630,3 миң сом;
мүлктү пайдалануудагы бузуулар жана кемчиликтер – 57 миллион 283,3 миң сом;
эсептин жана отчеттуулуктун тартибин бузуу – 214 миллион 824,1 миң сом;
мамлекеттик сатып алуулар мыйзамын бузуулар – 612 миллион 670,5 миң сом;
ченемдик-укуктук актылардын жана эл аралык келишимдердин кагылышуусу, процессуалдык бузулушу – 47,4 миң сом.
Жүргүзүлгөн аудиттин жыйынтыгы менен министрлик тарабынан жол мунай битумунун сатып алынышы боюнча материалдар укуктук баа берүү үчүн УКМКга жөнөтүлө турганы кошумчаланды.