БИШКЕК, 27-янв. — Sputnik. Окуучуну сүзүп кеткен деп Балыкчы шаарынын ички иштер бөлүмүнүн башчысы Бектур Осмонбаев кармалды. Бул тууралуу ИИМдин маалымат кызматы кабарлады.
Ага чейин УКМК Осмонбаевге издөө жарыялаган, көп өтпөй ИИМ ШИИБдин мурдагы начальниги кармалып, тергөө кызматына берилгенин кабарлады. Андан соң тергөө иштерин жүргүзүү үчүн Осмонбаев УКМКга өткөрүлүп берилет.
Эске салсак, жол кырсыгы кечээ, 26-январда, болгон. Анда Geely Monjaro үлгүсүндөгү автоунаанын айдоочусу 11 жаштагы кызды сүзүп кеткен. Транспорт Балыкчы шаардык ички иштер башкармалыгына таандык экени такталган. Окуя чуу жаратып, кыздын атасы видеокайрылуусунда кырсыкка шаардык милициянын жетекчилеринин бири күнөөлүү экенин айтып чыккан. ИИМ кызматтык иликтөө жүргүзүп, жыйынтыгында рулда болгом деген аймактык тескөөчү менен шаардык милициянын башчысы болуп иштеген агасын иштен алган. Саламаттык сактоо министрлиги окуучу кыздын абалы туруктуу оор экенин билдирди. Бул окуя боюнча Кылмыш-жаза кодексинин 144-беренеси ("Коркунучта калтыруу - этиятсыздыктан ден соолукка оор залал келтирген жосун") жана 312-беренеси ("Автомототранспорт каражаттарынын кыймылынын жана аларды эксплуатациялоонун коопсуздук эрежелерин бузуу - этиятсыздыктан ден соолугуна оор залал келтирген ошол эле жосун") боюнча кылмыш иштери козголду.