БИШКЕК, 24-янв. — Sputnik. Баланын сүт тиштери толук чыгып бүткөндөн кийин ага тиш щётка, паста менен жууганды үйрөтө берсе болот. Адатта үч жашка чейин чүрпөнүн сүт тиши толукталат. Бул тууралуу КММАнын балдар стоматологиясы кафедрасынын башчысы Илшат Юлдашев Ден соолукту чыңдоо борборуна түшүндүрүп берген.
"Айрым ата- энелер баланы күчкө салып тишин жууп берип жалкытып алышат. Бул туура эмес. Мындан кийин бала акылы киргенге чейин такыр тишин жуубай коюшу мүмкүн. Андан көрө колуна щётканы карматып, тиш тазалоону оюнга айландырыңыз", — деген Юлдашев.
Ошондой эле ал балага жумшак щётка, курамында фтору жок паста тандоо керектигин айткан. Айрым ата-энелер балдары күнүнө эки маал тишин жууса да кариес пайда болорун айтышарын белгилеп, мындайда бала тиштерин туура эмес жууп жатат деп түшүндүргөн.
"Негизи тишти эки мүнөттөн беш мүнөткө чейин жууган талапка ылайык. Эки мүнөттөн аз жууса же тескерисинче, беш мүнөттөн көпкө жууса дагы тиштер жабыркайт", — деди балдар стоматологу.