БИШКЕК, 22-янв. — Sputnik. Жоокерлерди сабаган делип Коргоо министрлигинин аскер бөлүгүнүн үч командири кармалды. Бул тууралуу Башкы прокуратуранын маалымат кызматы кабарлады.
Билдирмеге караганда, Аскер прокуратурасы Коргоо министрлигинин аскердик бөлүгүндө зомбулуктун фактыларын аныктаган. Бул окуя боюнча Кылмыш-жаза кодексинин 138-беренеси ("Уруп-сабоо, кыйноо") боюнча иш козголгон.
"Жоокерлерди уруп-сабоого шектелип үч командир камакка алынды. Бул ишке тиешеси бар башка да жоопкерчиликтүү адамдар такталып жатат", — деп айтылат маалыматта.
Башкы прокуратура жарыялаган сүрөттөн жоокерлер пол жуучу швабра жана таяк менен сабалганын түшүнүүгө болот.