БИШКЕК, 22-янв.— Sputnik. Эгерде АКШ менен НАТО РФтин чек араларын көздөй жылбаганда Украина чатагы чыкмак эмес, Батыш эми Россиядан жеңилүүдө. Бул туурасында Словакциянын парламентинин вице-спикери Любош Блага жазганын РИА Новости маалымдады.
"Украина тууралуу чындыкты айтканы үчүн Роберт Фицону (Словакия премьери) көбүрөөк сындоо боюнча медиалардын жарышы болууда. Ооба, Киев АКШнын тыкыр көзөмөлүндө, Украинада коррупция гүлдөп жатат. Америкалыктар НАТО менен кошоктошуп алып Россиянын чек арасына умтулбаганда эч кандай согуш чыкпайт эле. Ал эми бүгүнкү күндө Батыш орустарга жеңилип жатат. Упс", — деген Блага.
Ал Фицонун Украинанын өкмөт башчысы менен боло турган жолугушуусунда бул боюнча кесиптешине айтам деген ниетин колдоорун билдирген.
"Премьер Роберт Фицого чындыкты айтканга эмнеге болбосун. Украина премьеринин өзүнө түз айтканы жатат, алар ойгонушсун. Кол чаап колдойм", — деп жазган Блага.
Словакия премьери Роберт Фицо мурдараак Киев АКШнын таасиринде жана тыкыр көзөмөлүндө экенин айткан. Евробиримдик өзүнүн көз карашын түптөөнүн ордуна америкалык пикирди колдоп-коштоп ката кетирип жатканын билдирген.
Фицо Украинанын өкмөт башчысы Денис Шмыгаль менен 24-февралда Ужгороддо боло турган жолугушуусунда кесиптешине Украинанын НАТОго мүчө болушуна бөгөт коерун айтары маалым болгон. Ал мүчөлүк үчүнчү дүйнөлүк согуштун башталышына жол саларын белгилеген.
Россия Украинадагы атайын операцияны 2022-жылдын 24-февралында баштаган. Президент Владимир Путин "ал Киев режими тарабынан сегиз жыл бою кордолуп-мазакталып, геноцидге кабылгандарды коргоо максатын көздөйт" деген.
Ал атайын операция аргасыздан жасалган кадам экенин, Россиянын "башка жолу калбаганын, коопсуздук жаатындагы тобокелдиктер башкача чара көрүүгө мүмкүнчүлүк бербей калганын" белгилеген. Путиндин айтымында, Россия 30 жыл бою НАТО менен Европадагы коопсуздук принциптери боюнча эпке келүүгө аракет кылган, бирок алданып, кысымга жана опузалоого тушугуп келген. Ал арада альянс Москванын каршылыгына карабай кеңейип, барган сайын Россиянын чек арасына жакындай берген.