БИШКЕК, 19-янв. — Sputnik. Токтогул ГЭСинде ИИМдин ички аскерлер бөлүгүнүн жоокеринин өлүмү боюнча иш Жалал-Абад шаардык сотуна өткөрүп берилди. Бул тууралуу Sputnik Кыргызстанга Башкы прокуратурадан билдиришти.
Көзөмөл органынын маалыматына караганда, каза болгон У.Б. менен чогуу кызмат өтөгөн аскерге Кылмыш-жаза кодексинин "Адам өлтүрүү" жана "Дезертирлик" беренелери боюнча айып тагылууда.
"20-ноябрь күнү саат 5:50дө 7 706 аскер бөлүгүндө кароолдун жетекчиси К.Ж. текшерүү үчүн тревога жарыялаган. Бул учурда С. Т. менен У. Б. ортосунда пикир келишпестик чыгып, У.Б. С.Тны көздөй ок чыгарган. Натыйжада ал каза тапкан. Шектүү качып кетип Кара-Көлдөгү үйлөрдүн биринде жашырынып жүргөн. Кийин ал колго түшүп камакка алынган. Учурда ал Ош гарнизонунун гауптвахтасында жатат", — деп айтылат маалыматта.
Башкы прокуратура У.Бдан сырткары, аскердик бөлүктүн кароолунун жетекчиси дагы кылмышка айыпталып жатканын билдирди.
"К.Жга карата өзүнчө кылмыш иши козголду. Анткени ал мыйзамсыз негизде тревога жөнүндө буйрук берген. Ага Кылмыш-жаза кодексинин "Кароолдук кызматты аткарууда эреже бузуу" беренеси боюнча айып тагылууда. Бул иш Жалал-Абад шаардык сотуна дагы жөнөтүлдү.