БИШКЕК, 16-янв. — Sputnik. Массалык башаламандыкка чакырык жасоо иши боюнча 11 журналист кармалып, 48 саатка убактылуу кармоочу жайга киргизилди. Бул туурасында Ички иштер министрлигинин маалымат кызматы билдирди.
Бүгүн таңда ИИМдин кызматкерлери алардын үйүн тинтип, суракка алып кеткен.
“Тергөө кызматы “Айт, айт десе” жана Temirov Live баракчаларына 2023-жылдын 30-декабрында соттук-лингвистикалык экспертиза дайындаган. Анын корутундусу 12-январда чыгып, массалык башаламандык уюштурууга чакырык жасоонун белгилери аныкталган”, — деп айтылат маалыматта.
ИИМ журналисттердин үйүн тинтүү учурунда документтер, уюлдук телефондор, фотоаппараттар, ноутбуктар, компьютерлер, планшеттер, техникалык жабдуулар жана банктык карталар табылганын белгиледи. Жалпысынан 162 буюм алынган.
Кармалган журналисттерге Кылмыш-жаза кодексинин 278-беренесинин ("Массалык башаламандыктар") 3-бөлүмү ("Бийлик өкүлдөрүнүн мыйзамдуу талаптарына жигердүү баш ийбөөгө жана массалык башаламандыктарга чакырыктар, ошого тете жарандарга зомбулук көрсөтүүгө чакырыктар") боюнча айып тагылууда.