БИШКЕК, 12-янв. — Sputnik. Жогорку Кеңештин депутаты Нуржигит Кадырбеков кыргыз тили боюнча тестирлөөдөн эң жогорку упай алып, рекорд жаратты. Бул тууралуу "Ыйман Нуру" парламенттик фракциясынын жыйынына катышкан "Кыргызтест" мамлекеттик мекемесинин директору Батма Топоева-Ставинская билдирди.
Анын айтымында, ведомсвто 2021-жылдан бери жаңы программа боюнча тестирлөө жүргүзүп келет.
"Биз депутаттарга башкаларга үлгү болуп кыргыз тилинен тест тапшырып коюуну суранганбыз. Кадырбеков жаңы жыл алдында 90 депутаттын ичинен биринчилерден болуп тестти ийгиликтүү тапшырды", — деди ал.
Адис белгилегендей, экзамен боюнча эң жогорку балл мурда 86,8 болчу. 2022-жылы эң жогорку упайды (91,6) Улукбек Абсаматов алса, 2023-жылы Кадырбеков рекордду жаңылады (96,8 упай). Парламентарийге тесттен өткөндүгү тууралуу сертификат тапшырылды. КР президентинин алдындагы Мамлекеттик тил жана тил саясаты улуттук комиссиясынын төрагасы Каныбек Осмоналиев, конституциялык мыйзамга ылайык, муниципалдык жана мамлекеттик кызматкерлер, президент жана Жогорку Кеңештин депутаттары кыргыз тилин билүүгө милдеттүү экенин эске салды.