БИШКЕК, 12-янв. — Sputnik. Ооруларды алдын алуу жана мамлекеттик санитардык-эпидемиологиялык көзөмөл департаменти сак-саламат жашоонун беш эрежесин эскертти.
Туура тамактануу
Организм зарыл болгон бардык заттар менен камсыздалышы үчүн рационуңузга түрдүү азыктарды киргизиңиз. Кумшекер, туз жана майды ашыкча колдонуудан карманган туура.
Көп кыймылдаңыз
Үзгүлтүксүз машыгуу — ден соолук үчүн миңдин бири. Өзүңүзгө ырахат, кубаныч тартуулай турган кыймылдын – спорттун түрүн тандап алыңыз. Чектен ашпаган машыгуулар – организмди тонуста кармап турууга шарт түзөт.
Эс алып, мээ сергитиңиз
Медитация, йога же таза абада сейилдөө сыяктуу стресс менен күрөшүү техникаларын үйрөнүү да сиздин саламаттыгыңызга оң таасир берет. Психикалык абалыңызды социалдык байланыштар, баарлашуулар аркылуу жакшыртыңыз.
Зыяндуу адаттардан арылыңыз
Спирт ичимдиктерин ичүүнү чектеңиз жана чылымдан баш тартыңыз. Зыяндуу адаттарды пайдалууга өзгөртүңүз, мисалы, кофенин ордуна чай ичиңиз, таттуулардын ордун жашылча-жемиш менен толуктаңыз.
Убак-убагы менен медициналык кароодон өтүп туруңуз
Дарыгерге баруу мөөнөтүн улам-улам жылдырбаңыз. Өз убагында медициналык текшерүүдөн өтүү – көптөгөн ооруларды эрте аныктап, өтүшүп кетишин алдын алат.
Инжект: https://sputnik.kg/20240106/moncho-den-sooluk-ehrezhe-terapevt-1081764480.html