БИШКЕК, 12-янв. — Sputnik. Уйкусуроо, алсыздык, чарчаңкы абал кээ бир витаминдердин жетишсиздигинен пайда болушу мүмкүн. Бул тууралуу гинеколог Екатерина Волкова айтканын "Доктор Питер" басылмасы жазды.
Адис өзгөчө 40 жаштан өткөн аялдар ден соолугуна тыкыр кам көрүшү керектигин айтып, көбүнчө төмөнкү витаминдер сунушталып келерин белгилеген:
D витамини кальцийдин сиңишине жардам берип, сөөктүн бекем болушуна жооп берет. Ошондой эле кант диабети, инфаркт, семирүү жана аллергияны алдын алат. Бул витаминдин жетишсиздиги депрессияга өбөлгө болот.
А витамини теринин сапатына, репродуктивдик системанын ишине жооп берет.
Е витамини жыныс гормондорунун синтезинде маанилүү роль ойнойт. Атеросклероз менен тромбозду алдын алып, терини ультра нурдан коргоп, боордун иштешине кам көрөт.
В группасындагы витаминдер калкан бези менен эритроциттер үчүн керектелет. Нерв системасынын өрчүшүнө, мээге керектүү витаминдердин бири болуп саналат.
С витамини организмди зыяндуу заттардан коргоп, муун менен теринин структурасы үчүн зарыл.
Анткен менен гинеколог витаминдерди өзү билемдик менен ичүү туура эместигин, анын кесепети оор болорун эскерткен.
"Витамин ичердин алдында сөзсүз түрдө дарыгер менен кеңешиңиз. Витаминдердин ашыкча болушу жетишпегенге караганда алда канча кесепеттүү болушу мүмкүн", — деп сөзүн жыйынтыктады Волкова.