БИШКЕК, 8-янв. — Sputnik. Россия Вашингтон менен Брюссель эртең санкцияларын алып койсо да Батышка жүзүн эч качан бурбайт. Бул туурасында РФ президентине караштуу ишкерлердин укугун коргоо боюнча ыйгарым укуктуу өкүл Борис Титовдун айтканын РИА Новости жазды.
Ал Батышты буга чейин көрүп-билип калган, тапталып бүткөн нерсе экенин, адамзаттын келечеги Чыгышта жатканын, алар Москва менен достук мамиледе гана болбостон, соода-экономикалык мамилени да өнүктүрүүнү каалаарын белгилеген.
"Билесиздерби, Вашингтон менен Брюссель эртең санкцияларын алып салып, бизге ыктай баштаса да Батышка эч качан жүз бурбайбыз. Ишенип коюңуз, кайрылып баруу деген болбойт. Батыш — өткөн этап. Кааласаңар, аны адамзат басып өтүп койгон десек болот. Келечек — Чыгыш, мындайча айтканда, буга чейин кеп кылып келгендей, глобалдуу Түштүк", — деген Титов.
Ыйгарым укуктуу өкүл аталган аймактар азыр тездик менен өнүгүп жаткандыгын, ал жакта эбегейсиз кубаттуу адам ресурстары бар экенин, жаңы технологиялар жаралып жатканын белгилеген.
"Биздин достор жылуу мамиле түзүп эле тим болбостон, Москва менен соода-экономикалык мамилелерди өнүктүрүүгө да кызыкдар", — деген ал.