БИШКЕК, 6-янв. — Sputnik. Иранда Кум шаарындагы шииттердин Жамкаран мечитинде өч алуунун белгиси катары эсептелген кызыл түстөгү желек көтөрүлдү. Бул тууралуу Fars агенттиги маалымдады.
Туу мечиттин үстүндө Кермандагы терактыдан кийин пайда болгону айтылды. Ушундай эле желек 2020-жылы Иран генералы Касем Сулейманинин өлүмүнөн кийин илинген. Ошол жылы америкалык CNBC телеканалы шииттердин салтындагы кызыл туу адилетсиз төгүлгөн канды жана өлтүрүлгөн адамдын өчүн алууга чакырыкты билдирерин белгилеген.
Эске салсак, 3-январда Сулеймани коюлган жердеги эскерүү иш-чарасында жарылуу болгон. IRNA агенттигинин маалыматы боюнча, терактыдан 89 адам каза болуп (анын ичинде 15 жаштан өтө элек 12 бала бар), 284 киши жабыркаган.
Терактыдагы жоготуудан улам Иран өкмөтү 4-январды улуттук аза күнү деп жарыялаган. Кыргызстан президенти Садыр Жапаров окуяга байланыштуу көңүл айтып, "террорчулукту айыптайбыз" деп билдирген
2020-жылдын 3-январына караган түнү АКШ Багдадда Ислам революциясынын күзөт корпусунун атайын бөлүмчөсүнүн командири Касем Сулейманини жана Ирак шииттер кошуунунун башчысынын орун басары Махди аль-Мухандисти жок кылуу боюнча операция жүргүзгөн. Вашингтон аларды 2019-жылы 31-декабрда Американын Багдаддагы элчилигине кол салууну уюштурууга катышкан деп эсептейт.
Ага жооп катары Иран АКШнын Ирактагы базаларына сокку урган, анын ичинде Айн-аль-Асад дагы бар. АКШнын ошол кездеги президенти Дональд Трамп жана Пентагондун жетекчиси чабуулдан кийин жабыркагандар жок деп билдиришкен. Кийин аскер кызматкерлери жаракат алгандар бар экенин ачык айтып чыгууга мажбур болушкан. Алардын саны туруктуу түрдө өсүп келет.