БИШКЕК, 29-дек. — Sputnik. Эки миллиондон ашык санариптик эмдөө карталары түзүлдү. Саламаттык сактоо министрлиги iEmdoo маалыматтык тутумунун жардамы менен вакциналарды алган адамдарды персоналдык эсепке алып жатканын билдирди.
Анда эмдөөлөрдүн бардык түрлөрү, анын ичинде пландуу жана эпидемиологиялык себептер боюнча жүргүзүлгөндөр боюнча толук жана персоналдаштырылган маалыматтар жазылат. Ошондой эле медициналык каршы көрсөтмөлөр, эмдөөдөн кийинки мүмкүн болуучу терс таасирлер жана бейтаптын өмүр бою ден соолугунун башка маанилүү аспектилери жөнүндө камтылат.
"Санариптик карта төрөт үйүндө жаңы төрөлгөн баланы биринчи эмдөө учурунда башталат. Андан кийин алынган маалыматтар саламаттык сактоо системасынын бардык деңгээлдеринде эмдөөлөрдүн ишенимдүү жана бирдиктүү эсепке алынышын камсыз кылуу менен бейтапканаларга өткөрүп берилет. Тиркемеден кыргыз, орус жана англис тилдеринде эмдөө сертификаттарын алуу мүмкүнчүлүгү бар. Бүгүнкү күндө биринчи жолу 2 миллион 15 миң санариптик эмдөө карталары түзүлүп, бюджеттен болжол менен 20,1 миллион сом үнөмдөлдү", — деп айтылат маалыматта.
Бул маалыматтардын жоголушуна жол бербей, ар кандай медициналык мекемелердин ортосунда маалымат алмашууну жөнөкөйлөтүп, ошондой эле коомдук саламаттык сактоо тармагында натыйжалуу башкаруу чечимдерин кабыл алууга негиз түзөт. Эмдөө картасы "Түндүк" мобилдик тиркемесиндеги "Санарип ден соолук профили" аркылуу жеткиликтүү.