БИШКЕК, 20-дек. — Sputnik. Желек өзгөртүлгөндөн кийин паспорт, айдоочулук күбөлүк сыяктуу документтер мөөнөтү бүткөнчө жана мамлекеттик органдар алмаштыруу чечимин чыгарганга чейин жарактуу болот. Бул туурасында парламент кабыл алган мыйзам долбоорунда жазылган.
Документтеги желектин сүрөтү төмөнкүдөй тартипте алмаштырылат:
азыркы үлгүдөгү туунун сүрөтү түшүрүлгөн расмий документтердин бардык түрлөрү жарактуулук мөөнөтү аяктаганга чейин колдонулат. Жаңысын берип жатканда (паспорттор, айдоочулук күбөлүк) өзгөргөн желектин сүрөтү түшүрүлөт;
документтин жарактуулук мөөнөтү жок болсо мамлекеттик орган аны алмаштыруу чечимин кабыл алганга чейин пайдаланылат;
унаалардын номерлерине, транспортту каттоо жөнүндөгү күбөлүктөгү желектин сүрөтү да бийлик атайын чечим менен тыюу салганга чейин жарактуу болот.
Тууну өзгөртүү боюнча мыйзам долбоору президент кол койгондон 10 күн өткөндөн кийин күчүнө кирет. Бүгүн Жогорку Кеңеш долбоорду Садыр Жапаровдун кароосуна жөнөттү.