ЕАЭБге товарларды экспорттоого жана импорттоого лицензияларды, уруксат кагаздарын электрондук түрдө алууга болорун Марс Жылдызев Sputnik Кыргызстан радиосунун эфиринде маек куруп жатып билдирди.
Анын айтымында, мындай жол ЕАЭБге товар экспорттоону жана импорттоону жеңилдетет.
"Евразия экономикалык комиссиясынын чечимине ылайык, ишкерлерден электрондук лицензия жана уруксат кагаздарын алуу үчүн импорттолчу же экспорттолчу товарга жараша документтер талап кылынат. Буга чейин товар жиберүү үчүн бир канча министрликке барып, кол койдуруп, керектүү документтерди жыйнап келишкен. Ал эми бүгүнкү күндө ишкерлер кайсы жерде болбосун алар өзүнүн жеке кабинетинен эле электрондук лицензияларды жана уруксат кагаздарын ала алышат. Мындай кадам ишкерлер үчүн өтө ыңгайлуу. Эң биринчиден, убактысы үнөмдөлөт. Товар текшерилип, эксперттер аны импорттоого жана экспорттоого уруксат бергенден кийин лицензия берилет. Андан кийин автоматтык түрдө лицензия Бажы кызматына кетет. Бул процесстен соң ишкер товарын чет өлкөгө чыгара берсе болот. Электрондук лицензиянын берилип баштаганы товар жиберүүнү жеңилдетип, ишкерлердин ишине жарап жатат. Лицензия 7 күндөн 3 күнгө чейинки аралыкта берилет", — деди Жылдызев.
Ал товар экспорттоодо жана импорттоодо сапатка өзгөчө көңүл буруларын кошумчалады.