БИШКЕК, 27-ноя. — Sputnik. Кыргызстан октябрдагы жер титирөөдөн жабыркаган Афганстанга гуманитардык жардам жибере турганын ӨКМдин маалымат кызматы кабарлады.
Билдирмеге караганда, президент Садыр Жапаровдун тапшырмасы менен ӨКМ тарабынан жакынкы күндөрү 75 тонна ун, 20 тонна кумшекер, 5 тонна өсүмдүк майы жана 500 керебет, 500 жууркан, 500 матрас афган элине жөнөтүлөт.
"Ошондой эле Эл аралык жарандык коргонуу уюму тарабынан бөлүнгөн 1 миллион сомго аялдар жана балдарга кышкы кийим-кече, бут кийим, оюнчук, таттуу азыктар, гигиеналык каражаттар алынды", — деп айтылат маалыматта.
Эске салсак, 2023-жылдын 7-октябрында Афганстандын Герат шаарынын түндүк-батыш тарабында очогунда күчү 6,3 балл болгон жер титирөө катталып, 2 миңден ашык адам каза болуп, 9 миңден ашык киши жабыркаган.