БИШКЕК, 24-ноя. — Sputnik. Израилдин Газа секторундагы палестиналык качкындарга жардам берип жаткан БУУга караштуу Жакынкы Чыгыш агенттигинин мектебине урган соккусунан 30дай киши каза болгонун Ливандын Al Mayadeen телеканалына таянып РИА Новости жазды.
Телеканалдын ошол жерде жүргөн кабарчысы сокку Жебалия шаарынын жанында жайгашкан качкындар лагеринин батышындагы "Абу Хусейн" мектебине урулганын билдирген.
Ал эми France Presse басылмасы "Аль-Авда" ооруканасында иштегендерге таянуу менен мектепте качкындар баш калкалап келгенин, соккудан улам 27 киши каза таап, дагы 97 адам жарадар болгонун кабарлады.
Израилдин Коргонуу армиясы (ЦАХАЛ) шейшембиде Жебалияны курчап алганын маалымдаган.
Эскерте кетсек, Израиль менен ХАМАС Катардын ортомчулугу менен чыр чыккандан баштап биринчи ирет убактылуу элдешүү боюнча макулдашууга жетишкен, тараптар туткундарды бошотуу үчүн төрт күнгө ок атуунун бардык түрүн токтото турмай болгон. Макулдашууда 23-ноябрдан тарта каршылашкан жактар атышпай турары айтылганы менен кийин анын мөөнөтү жылып кеткен.
Тараптардын аймактык кызыкчылыгы менен байланышкан палестиндер менен израилдиктердин жаңжалы ондогон жылдардан бери аймактагы кагылышуунун себепкери болуп келет. СССРдин кийлигишүүсү менен 1947-жылы БУУ Израиль жана Палестина мамлекеттерин түзүү чечимин кабыл алган. Бирок натыйжада Израиль гана түзүлгөн. Тель-Авив эки өлкө принцибине макул болгону менен палестиналык аймактарды бошотпой келет.