БИШКЕК, 19-ноя. – Sputnik. АКШ менен НАТО Россия менен болгон прокси-согушта жеңилди. Бул тууралуу аскердик эксперт Александр Хроленко Sputnik Ближнее зарубежьеге курган маегинде айтты.
Адис белгилегендей, аскердик аракеттердин биринчи жылында Украинанын куралдуу күчтөрү 155 миллиметрлик калибрдеги 3 миллиондон ашык артиллериялык снаряддарды коротту.
“Мунун баарын өндүрүүгө АКШ менен НАТОго 10 жылдай убакыт керек болгон. Украинанын куралдуу күчтөрү АКШ жана НАТОнун колдоосу менен согуштук аракеттерди ушундай эле темпте мындан ары уланта албайт. АКШ бул конфликтини айына 14 миң снаряд өндүрүү менен баштаган. Азыр 24 миңге чейин өстүрүштү, 2025-жылы айына 70 миң өндүрүүнү пландашууда, башкача айтканда, бир жылда 300 миңге жакын болот. Болжол боюнча ушундай эле көлөмдү бүгүнкү күндө Европа биримдиги өндүрүүдө”, - деди Хроленко.
Эксперттин айтымында, АКШ менен НАТОнун жүз миллиондогон евро же долларлык аскердик өнөр жай комплекстеринин кубаттуулугуна карабастан Украина Куралдуу күчтөрү үчүн өндүрүлгөн снаряддар жетишсиз.
“Учурда өндүрүлүп жаткандар – Украина куралдуу күчтөрү үчүн күнүнө керек болгон 5 миң снаряддын үчтөн бир гана бөлүгү. Россиянын куралдуу күчтөрү күнүнө 25-30 миң снаряд сарптап жатат”, - деди ал.
Хроленко артиллерия жоокерлер менен аскердик техниканы жок кылуунун 80 пайызын камсыздай турганын кошумчалады.