БИШКЕК, 16-ноя. — Sputnik. ЕАЭБдин бирдиктүү техникалык жөнгө салуу системасын түзүүдө алдыга жылуу үчүн коркпой, тоскоолдуктарды басып өтүшүбүз керек. Бул тууралуу Евразия экономикалык комиссиясынын техникалык жөнгө салуу министри Виктор Назаренко 15-ноябрда Москвада өткөн "Интеграция" деп аталган Евразиялык ишкерлер форумунун пленардык жыйынында билдирди.
Ал ЕАЭБдин бирдиктүү техникалык жөнгө салуу системасын түзүү аягына чыгып калганын айткан. Бирок анын андан аркы иштерине, интеграциялык мүмкүнчүлүктөргө зыян келтирип, мамлекеттик деңгээлдеги таасир көрсөтүү инструменттерин сактап калуу тенденциялары тоскоол болуп жатканын белгилеген. Министр жаңы тармактар боюнча интеграция барган сайын кыйын болуп баратканын кошумчалаган.
Евразия экономикалык комиссиясынын техникалык жөнгө салуу министри Виктор Назаренко
© Фото / пресс-служба ЕЭК
"Техникалык жөнгө салуу – атаандаштыкка жөндөмдүүлүктү жогорулатууга жардам бере турган нерсе. Биримдикте техникалык жөнгө салуу чөйрөсүндө бирдиктүү саясат жүргүзүү тууралуу макулдашууга кол коюлганына 10 жыл болду. Бул аралыкта биз техникалык жөнгө салуунун алты багытынын ичинен эки гана чөйрөсүндө улуттар аралык механизмдерди түзө алдык", — деди Назаренко.
ЕЭК министри ЕАЭБдин бирдиктүү рыногун кооптуу продукциядан коргоо, ата мекендик жана чет элдик продукция бул рынокко жеткиликтүү болушу үчүн бирдей шарттарды түзүү маселелерине да токтолгон.