БИШКЕК, 2-ноя. — Sputnik. Бишкекте өлтүрүлгөн бир үй-бүлөнүн иши боюнча сотто прокурор Чынтемир Аширалиевди күнөөлүү деп таап, өмүр бою эркинен ажыратууну сурады.
Ал Аширалиевдин мүлкүн конфискациялап, өзгөчө тартиптеги колонияга киргизүү зарыл деп эсептейт.
"Баласын мыйзамдуу аялы билген эмес. Аширалиев Алтынай Канзамановага тогуз жолу бычак сайган. Баланы кыйнап, муунтуп өлтүргөн. Маркум экөөнүн ортосунда акча аласа-бересеси болгон. Хамзаманова Аширалиевге гана эмес, тааныштарына да акча берип жүргөн. Аудиодо Хамзаманова аялыңа айтам дегенде Аширалиев "доиграешься" дегени бар. Мына, максатына жетти! Экспертиза кан группасы боюнча Салим Аширалиевдин баласы болушу мүмкүн экенин чыгарды. Баланын сөөгүнүн жанында да көпкө отурганы ортосундагы байланышты билдирет", — деген прокурор.
Жабыркаган тараптын жактоочусу да өмүр бою кесүүнү сурап, 4 миллион 600 миң сом компенсацияны төлөп берүүсүн талап кылган.
"Тергөө жетиштүү жүрдү. Өзүнөн 15 жаш улуу аял менен таанышып, акчасы бар экенин билип алган. Бул — эки жүздүү. Анткени кылмышты жасап коюп, эртеси иш-чарага барып жалындуу сөздөрдү сүйлөгөн. Экспертиза Алтынайдын спирт ичимдигин колдонгонун тапкан жок. Жакын мамиледе болгондору да аудиодо далилденди", — деген жактоочу.
Эскерте кетсек, үрөй учурган каргаша үстүбүздөгү жылдын 16-февралында 5-кичи райондогу батирлердин биринде болгон. Анда 51 жаштагы аял (Алтынай Канзаманова) жана анын 17 жаштагы кызы менен 9 жаштагы уулу киши колдуу болгон. Бул кылмышка шектелип УКМКнын мурдагы кызматкери, 37 жаштагы Чынтемир Аширалиев кармалган.