БИШКЕК, 2-ноя. — Sputnik. Россия лидери Владимир Путин экономикалык маселелер боюнча кеңешме өткөрүп жатып Батыш салган санкцияларынын майнапсыздыгынан улам диверсияга бара турганын четке каккан жок. Бул туурасында РИА Новости жазды.
“Түндүк агымды” эмне кылышканы жадыбызда турат. Жакында Финляндия менен Эстониянын ортосундагы газ кууруна зыян келтирди деп Россияны күнөөлөгөнгө аракет кылганын эске салсак, алар тарабынан жасалчу чагымчылыкты такыр эле жокко чыгарууга болбойт”, — деди президент.
Мамлекет башчысы мындай тобокелдиктерди, жалааларды алдын ала карап, байкап, буга алардан эртерээк реакция жасоого чакырды. Муну менен катар эле Россия санкциялык басымдын күчөшүнө даяр турушу керектигин белгиледи.
“Өнөктөш деп аталгандар өткөн жылдары абдан көп пакеттен турган санкцияларды бекитишти. Өздөрү да канча экенин билбей, эсебин ала албай калышты. Бизди жазалоого аракет кылганы менен жыйынтыгы биз көрүп тургандай, статистика айтып жатат — өздөрүнүн экономикасы аксады, жумуш орундары боюнча маселе жаралды”, — деди Путин.
Россия лидери чет элдиктер Москвага салган санкцияларынан өздөрү адашып калганын дагы бир ирет белгиледи. Фантазиясы болуп көрбөгөдөй аңкоолукка жеткенин, буроо бекиткичтен тарта ийнеге чейин чектөөгө алышарын кыялданганын эстетти. Ал Батыштан өлкөгө ташылып келе турган товарларга салынган тыюу боюнча да айтты.
“Оокат, буюмдар канчалык аз болсо, балким, ошончолук жакшыдыр. Европалык ири мегаполистерден буюмдар менен бүргө-канталаны кошо ала кирүү азаят”, — деген мамлекеттин башчысы.
Путин Россиянын экономикасын алсыратып жана чөгөлөтүү АКШ менен Евробиримдиктин узак мөөнөттүү стратегиясы экендигин, ал эми салган санкциялар дүйнөлүк экономиканы аксаткандыгын бир нече ирет айткан. Анын пикиринде, Батыштын максаты — миллиондогон адамдардын жашоосун начарлатуу.
Президент Россия коюлган чектөөлөрдөн ийгиликтүү өтүп келе жаткандыгын белгилеген.