Бишкек шаары боюнча көмүр 4700 сомдон жогору сатылбашы керек. Бул тууралуу Санжарбек Кокошеров Sputnik Кыргызстан радиосунун эфиринде маек куруп жатып билдирди.
Анын айтымында, Монополияга каршы жөнгө салуу кызматынын коюп берген баасына баш ийбегендерди аталган кызматка кабарлаш керек.
"Күз-кыш мезгилине даярдыктар жыл сайын апрель айынан тарта эле башталат. Ушул тапта көмүр баасынын эң жогорку суммасы канча болушу керектиги аймактарда белгиленип бүттү. Биз максималдуу бааны коюп бердик, эми сатуучулар андан ашырбай сатышы керек. "Кыргыз көмүр" менен келишим түзгөн отун базаларда Бишкек шаары боюнча көмүрдүн тоннасынын баасы 4700 сомдон ашпаш керек. Ал эми башка жеке жактар менен келишими бар жерлерде 5500 сомдон, ал эми эленген, тандалган көмүрдүн килограммынын баасы 6 сомдон жогору болбошу зарыл. Калган аймактарда жолго жараша баалар коюлду. Нарын облусунда 3200-6300 сом, Ошто 4000 – 7400 сом, Жалал-Абадда 4500 – 8200 сом, Баткенде 7000 – 10 500 сом, Ысык-Көлдө 4100 -8300 сом, Таласта 6300 – 7300 сом деп бекитилди. "Кыргыз көмүр" менен келишими бар тараптар ушул баадан өйдө сатып жатса эл бизге кайрылсын", — деди Кокошеров.
Ал Монополияга каршы жөнгө салуу кызматынын коюп берген баасына баш ийбеген сатуучуларга эскертүү берилип, айып пул салынарын кошумчалады.