БИШКЕК, 2-ноя. — Sputnik. ИИМдин маалымат кызматы башка бирөөнүн мүлкүн ээлеп алуу максатында жасалган оор кылмыштын бети ачылганын билдирип, шектүү колго түшүрүлгөнүн кабарлады.
Ага ылайык, 22-октябрда Чычкан капчыгайынан кырсыкка учураган "Жигули" үлгүсүндөгү автоунаа жана анын ичинен жигиттин сөөгү табылган.
Чычкан капчыгайынан кырсыкка учураган "Жигули"
© Фото / пресс-служба МВД КР
"Эксперттер болжолдуу кароо жүргүзүп, жигиттин денесинен жол кырсыгына тиешеси жок тактарды табышкан. Териштирүүнүн жыйынтыгында маркум 20-октябрдан бери дайынсыз деп изделип жаткан Бишкектин 22 жаштагы Т.Б. аттуу тургуну экени аныкталган. Ал Toyota Crown унаасы менен чыгып кеткен бойдон келген эмес", — деп жазылат маалыматта.
Топтолгон материалдардын негизинде Токтогул РИИБде Кылмыш-жаза кодексинин 122-беренеси ("Адам өлтүрүү") боюнча кылмыш иши козголуп, экспертизалар дайындалган.
Toyota Crown унаасы
© Фото / пресс-служба МВД КР
Милиция маркумдун унаасын издеп, кийин аны башка адам айдап жүргөнүн аныктап, колго түшүргөн. Бирок айдоочу машинаны 21-октябрда соцтармакта шашылыш саткан кишиден 8 700 долларга алганын айткан.
"Милиция 30 жаштагы К. уулу А. аттуу сатуучунун изине түшүп, аны Бишкектен кармаган. Шектүү унаасын сатам деп жүргөн маркумдун ишенимине кирип машинасын алат. Ал ортодо унааны тез арада сатып, "Жигули" алганга үлгүрөт. Маркумду акчасын берем деп "Жигулиге" салып, Чычкан тарапка алып барып сабап, атайылап жол кырсыгын уюштурган", — деп айтылат кабарда.
30 жаштагы К. уулу А.
© Фото / пресс-служба МВД КР
Шектүү 2021-жылы Москвада ушундай эле жол менен кыргызстандык аялды өлтүргөнү аныкталганы кошумчаланды. Учурда ал Токтогул РИИБдин тергөө кызматына өткөрүп берилди. Учурда кошумча иликтөө иштери жүрүп жатат.