БИШКЕК, 21-окт. — Sputnik. АКШ бюджетинин дефицити быйыл 320 миллиард долларга өсүп, 1,7 триллион долларга жетти. Бул тууралуу финансы министри Жаннет Йеллен менен административдик-бюджеттик башкармалыктын директору Шаланда Янгдын 2023-жылдык бюджеттин жыйынтыгы боюнча биргелешкен докладында айтылганын “Известия” басылмасы жазды.
“2023-жылы бюджеттеги дефицит 1,7 триллион долларды түздү. Бул өткөн жылдагы дефициттен 320 миллиард долларга көп. ИДП боюнча алсак, дефицит 6,3 пайызды түздү. 2022-жылы 5,4 пайыз болчу”, — деп айтылат документте.
Докладдын авторлору “бюджеттин тартыштыгы президент Жо Байден кызматка киришкенден бери бир триллиондон ашык төмөн бойдон калууда” деп билдиришти. Буга пандемиядан кийин экономиканын калыбына келишине жардам берген эмдөө программасы себеп болгону айтылат. Мындан тышкары, ушул жылдын башында Байден 2024-жылы дефицитти дагы триллионго азайта турган эки тараптуу мыйзамга кол койгон.
Финансисттер бюджеттин тартыштыгынын негизги себеби катары кирешенин кескин кыскарышын атап, салык системасын реформалоо боюнча президент сунуштаган саясаттын маанилүүлүгүн белгилешти.
"2023-жылы киреше ИДПнын 16,5 пайызына чейин төмөндөдү, ал эми жеке адамдардын жана ишканалардын кирешеси салык кодекси күчүнө киргенден кийин жасалган болжолдорго ылайык, төмөнкү деңгээлге кайтып келди", — деп айтылат отчётто.