Күз-жаз айларында психикалык оорулар күч ала тургандыгын Шолпан Мамытова Sputnik Кыргызстан радиосунун эфиринде маек куруп жатып билдирди.
Анын айтымында, күз мезгилинде эмоцияга таасир эткен негизги эки жагдай бар.
"Биринчиден, күз айларында бир туруп күн ысып кеткени, бир туруп суук болуп кеткени адамдын эмоциясына түздөн-түз таасир этет. Күз-жаз мезгилдеринде адамдын маанайы тез-тез өзгөрүп турушуна ушул нерсе да себеп болушу мүмкүн. Анткени жай менен кышта аба ырайы бир калыпта турат эмеспи. Жайда ысык, кышта суук болуп дегендей. Экинчиден, күздө күн кыскарып, түн узарат. Жыйынтыгында адам Д витаминин азыраак ала баштайт. Бул нерсе бактылуулук гормондорунун азайышын шарттайт. Бат эле караңгы кирип калган кезде адамда мелатонин гормону көбөйүп, уктагысы эле келе бериши мүмкүн. Күз айларында маанайдын бат-баттан өзгөрүп турушуна ушул эки жагдайды эң негизгилери деп атасак болот. Ошондуктан кээде эч нерсе кылгыбыз келбей калат, кээде болсо туруп-туруп чоң нерселерди жасагыбыз келип кетет. Күз мезгилинде адамдын түшүнүксүз маанайда болушуна гормондор себеп", — деди психолог.
Ал күз мезгилинде адам көбүрөөк сейилдеши керектигин кошумчалады.