БИШКЕК, 17-окт. — Sputnik. Россия менен Венгриянын көз карашы дайым эле дал келе бербейт, антсе да Евробиримдиктин бир өлкөсү менен эки тараптуу алаканы эле эмес, дүйнөдөгү абалды да талкуулап алуу өтө маанилүү. Бул тууралуу РФ лидери Владимир Путин Венгриянын премьер-министри Виктор Орбан менен жолугуп жатып айтканын РИА Новости жазды.
Эскерте кетсек, РФ президенти расмий сапары менен Кытайга барган, ал "Бир алкак, бир жол" форумуна катышат.
"Евробиримдиктин бир өлкөсү болгон Венгрия менен эки тараптуу алаканы эле эмес, дүйнөдөгү, Европадагы кырдаал боюнча да пикир алмашуу өтө маанилүү деп эсептейм. Позицияларыбыз дайым эле дал келе бербейт, анткен менен баарлашуу олуттуу мааниге ээ", — деди Путин.
Өз кезегинде Орбан Будапешт бүгүнкүдөй оор абалда калып көрбөгөнүн, Венгриянын Россияга каршы туруу ниети болбогонун белгиледи.
"Татаал сүйлөшүүлөр өткөн, бирок мынчалык татаал сүйлөшүү болгон эмес. Мындай оор абалда калган эмеспиз. Венгриянын Россияга каршы туруу ниети жок, тескерисинче, дайым Москва менен алаканы кеңейтүүгө аракет кылып келгенбиз. Украинада атайын операциянын башталышы менен Венгрия — Россия мамилеси көп сыноого тушукту. Экөөлөп курган нерсеге доо кетти. Ошентсе да Венгрия эки өлкөнүн алакасындагы сактап калууга мүмкүн болгон нерсенин баарын коргоого аракет кылып жатканын көрүп-билип жатасыздар", — деди Орбан.
Расмий сапарынын алкагында Путин Вьетнамдын лидери Во Ван Тхыонг менен жолукту. Мындан тышкары, Таиланд, Монголия жана Лаос башчылары менен сүйлөшүүсү пландалган.