Калктын финансылык сабаттуулугу мурдагы жылдарга салыштырмалуу жогорулап калды. Эл арасында акчаны туура колдонуу, сактоо, сарптоо боюнча түшүнүк жакшырып калганын Кубаныч Мүсүралиев Sputnik Кыргызстан радиосунун эфиринде маек куруп жатып билдирди.
Анын айтымында, үй-бүлөлүк бюджетти башкаруу, балага туура финансылык көндүмдөрдү үйрөтүү, акчаны колдонуудагы тобокелчиликтер тууралуу Улуттук банк аймактарды кыдырып, маалыматтык кампаниясын күчөттү.
"Финансылык сабаттуулук боюнча бир да өлкө өтө жогорку деңгээлге чыга элек. Кыргызстан жана Орто Азия өлкөлөрүнүн көрсөткүчү орто деңгээлде. Жыл сайын республикалык акча топтоо жумалыгы, каржылык сабаттуулукту жогорулатуу боюнча иш-чаралар белгиленип турат. Мисалы, Улуттук банк 2016-2020-жылдары калктын финансылык сабаттуулугун жогорулатуу программасын кабыл алып, бир катар жолугушууларды уюштурду. Калктын финансылык сабаттуулугу мурдагы жылдарга салыштырмалуу кичине жогорулап калды. Эл арасында акчаны туура колдонуу, сактоо, сарптоо боюнча түшүнүк жакшырууда", — деди Мүсүралиев.
Ошондой эле адис финансылык пирамидаларга алдангандардын саны дагы деле көп болуп жатканын кошумчалады.