ЖАЛАЛ-АБАД, 11-окт. — Sputnik. Жалал-Абадда Россия-кыргыз аймактар аралык конференция ишин баштады.
Шаарга Россия менен Кыргызстандын өкүлдөрү кызматташууну, долбоорлорду каржылоону, туризм, соода жана ритейл багыттарын талкуулоо үчүн чогулушту. Программа өнөр жай объектилерин кыдырууну, Россия менен Кыргызстандын региондорунун "Достук" паркына капсула салуу аземин, көргөзмө жана бизнес-сессияларды камтыйт. Министрлер кабинетинин төрагасы Акылбек Жапаров менен Россия өкмөтүнүн төрагасынын орун басары Алексей Оверчуктун сөз сүйлөөсү күтүлүүдө.
Конференция ишкерлер кеңешинин жыйыны менен башталды. Мында эки өлкө компанияларынын долбоорлору сунушталат. Андан тышкары, соода-экономикалык жана инвестициялык кызматташуунун, энергетика, агроөнөр жай комплекси, микроэлектроника сыяктуу тармактардын артыкчылыктуу багыттары талкууланат.
Конференция Кыргызстан менен Россия футбол командаларынын жолдоштук беттеши менен жыйынтыкталмакчы. Иш-чара эки өлкөнүн алакасын бекемдөөгө арналган.