БИШКЕК, 10-окт. — Sputnik. ХАМАС өзүнүн Израилдеги операциясынын максаттарын аткарды. Эми диалогго даяр. Бул тууралуу кыймылдын саясий бюросунун мүчөсү Муса Абу-Марзук Al-Jazeera телеканалындагы маегинде билдирди.
"Биз максаттарыбызды аткардык. Эми бардык талкууларга жана саясий диалогго даярбыз", — деди ал.
Муса Абу-Марзук БУУнун Коопсуздук кеңешиндеги жыйында Палестина жана Израиль конфликти боюнча айтылган Россиянын позициясын татыктуу деп баалады.
"Россия АКШ менен Израилге Коопсуздук кеңешинде өзүнүн резолюциясын алдыга жылдырууга жол берген жок", — деди ал.
ХАМАС өкүлү кыймыл экинчи жарандыгын Россиядан алган израилдик туткундар маселеси боюнча Москва менен байланыш түзүп жатканын билдирди.
Ишемби күнү эртең менен Израиль Газа сектору тарабынан ракеталык масштабдуу соккуга учурады. ХАМАС жоокерлери өлкөнүн түштүк тарабындагы чек аралаш аймактарга кирип барган. Палестиналык кыймылдын аскердик канаты "Аль-Аксаны каптоо" операциясын жарыялады.
Ал эми Израилдин коргоо армиясы (ЦАХАЛ) "Темир кылыч" операциясын баштаган. Нетаньяху элге болгон кайрылуусунда өлкө согуш алдында турганын жарыялап, мобилизация жүргүзүү буйругун берген. Израилдик жоокерлер калктуу конуштарды көчүрө баштаган.
Кол салуунун кесепетинен Израилдин 800 жараны каза таап, 2,5 миң киши жаракат алган. Палестиналык отряддар жүздөгөн израилдик адамдарды туткунга алды. Алардын арасында жогорку даражалуу аскерлер дагы бар.
Палестинанын Саламаттык сактоо министрлигинин соңку маалыматтары боюнча, Газа секторунда каза болгондордун саны 687 кишиге жетти. Ал эми 3 726 адам түрдүү жаракаттарды алган.