БИШКЕК, 8-окт. — Sputnik. Ош шаарында дзюдо боюнча эл аралык "Сулайман-Тоо" кубогу мелдеши өтүп жатат. Бул тууралуу мэриянын маалымат кызматы кабарлады.
Турнирди шаардык Дене тарбия жана спорт комитети өткөрүүдө. Ага Кыргызстандын, Казакстандын, Россиянын жана Өзбекстандын 400дөн ашык спортчусу катышууда.
Мелдеш өспүрүмдөр арасында — 7 жаштан 16 жашка чейинки балдар ортосунда өткөрүлүп жатат. Анда кыздар менен уландарга бир нече салмак категориясы белгиленген.
Жеңүүчүлөр жана байге ээлери медаль, диплом жана баалуу белектер менен сыйланмакчы.