БИШКЕК, 6-окт. — Sputnik. Сексолог Татьяна Короткова Sputnik радиосуна курган маегинде күз мезгилинде жубайлардын төшөк кумарына каалоосун калыбында кармап туруучу кеңештерин айтты.
Адис аба ырайы өзгөргөн сайын маанайы кошо өзгөргөн адамдар күздүн келиши менен төшөк мамилесине кайдыгер боло баштаарын белгиледи.
"Либидо деңгээли, түгөйлөрдүн төшөк мамилесине каалоосу — биринчи кезекте адамдын абалынан көз каранды. Эгерде күздүн келиши менен адамдын башы ооруп, депрессияга түшүп кыйналып баштаса, бул, албетте, анын либидосуна терс таасирин тийгизет", — деп түшүндүрдү Короткова.
Анын айтымында, адамдын либидосун эки ыкма менен жогорулатса болот. Биринчиден, организмге кандай витаминдер жетишпегенин аныктоо керек, андан кийин жетишсиз витаминдерди ичүү зарыл.
"Төшөк мамилесине каалоосу болбой кайрылган адамды организминдеги витаминдерди текшерүү үчүн анализ тапшырууга жөнөтөм. Эгерде кайсы бир витамин жетишпей жатса аны ичүү керек. Мындан тышкары, күздө жубайлар төшөк мамилесинде көп убакытка тыныгуу кылбашы керек. Жыныстык катнаш канчалык көп болсо адамдын маанайы, абалы ошончолук жакшы болот. Себеби түгөйлөр кумарга баткан учурда бакыт гормондору иштелип чыгат", — деген сексолог.