БИШКЕК, 4-окт. — Sputnik. Улуттук коопсуздук мамлекеттик комитети Кыргызстандын жерлери Тажикстанга өттү деген маалымат боюнча комментарий берди.
Социалдык тармактарда Тажикстанга Оштун Чоң-Алай районундагы жерлер (Алтын-Мазар) өттү деген маалымат тарап жатат.
"Кызыкдар болгон тараптар кыргыз жерлери коңшу өлкөгө өткөнүн айтып мамлекеттик органдардын ишин жокко чыгарууну көздөп жатышат. Бул маалымат чындыкка дал келбейт", — деп айтылат УКМК тараткан билдирүүдө.
Комитет элди чагымчыл маалыматтарга ишенбөөгө чакырып, мамлекеттик органдардын расмий билдирүүлөрүнө гана таянууга үндөдү.
Эскерте кетсек, 2-октябрда Кыргызстан менен Тажикстандын өкмөттүк делегациялары Баткенде мамлекеттик чек араны делимитациялоо боюнча сүйлөшүүлөрдү жүргүзгөн. КР делегациясынын башчысы, УКМК жетекчиси Камчыбек Ташиев Кыргызстан менен Тажикстан чек ара маселесин биротоло чече турган №44 протоколго кол койгонун билдирген.