Бишкекте орус романсынын жаш аткаруучуларынын "Борбор азиялык романсиада" VII эл аралык сынагы өттү.
Кечээ күнү Кыргызстан, Казакстан жана Өзбекстандан келген 57 катышуучу конкурстук уктуруудан өтүп, гала-концертте жеңүүчүлөрдүн ысымдары жарыяланды.
Кыргыз улуттук филармониясынын сахнасында РФтин эмгек сиңирген артисти Галина Преображенская, "Россия" ансамблинин солисти Ирина Крутова, Өзбекстандын эл артисти Авазхон Ражабов, КР эмгек сиңирген артисттери Элнура Муктарбек, Тилек Найманбаев, Игорь Воронцов, Казакстандын улуттук академиялык опера жана балет театрынын солисти Эмил Сакавов, VII "Борбор азиялык романсиаданын" лауреаттары жана Бишкек мэриясынын Урмат Тентимишов жетектеген симфониялык оркестри көрүүчүлөргө көңүлдүү кеч тартуулашты.
Баш байгени кыргызстандык аткаруучу Элгиз Бейшенбаев жеңип алды. Ал декабрь айында Москвада өтө турган орус романстарынын жаш аткаруучуларынын "Романсиада" XXVII эл аралык сынагынын финалына катышат.
Sputnik Кыргызстандын шеф-редактору Эркин Алымбеков сынактын эң жаш катышуучусу — тогуз жаштагы Арсен Мухтарбековго сыйлык менен кошо белек тапшырды. Ал "Көрүүчүлөрдүн сүймөнчүгү" сыйлыгына ээ болду.
Сынакты КР Маданият министрлиги, Россиянын Бишкектеги илим жана маданият борбору (Русский дом), "Романсиада" кайрымдуулук фонду уюштурган.
Колдоо көрсөткөндөр: "Чет жердеги орус мурасы" фонду жана Кыргыз улуттук академиялык опера жана балет театры.
Конкурстун медиа өнөктөшү — Sputnik Кыргызстан маалымат агенттиги жана радиосу.