БИШКЕК, 27-сен. — Sputnik. Борбор калаадагы санитардык полигонго текстиль өндүрүшүнөн чыккан калдыкты экологияга зыян келтирбестен өрттөгөн атайын жабдуу орнотулду. Бул тууралуу Жаратылыш ресурстары, экология жана техникалык көзөмөл министрлигинин Бишкек – Аламүдүн аймактык башкармалыгынын башчысы Нурлан Шаршеев брифингде билдирди.
Иш-чара Sputnik Кыргызстан агенттигинин маалымат борборунда өткөн.
"Акыркы маалыматтар боюнча, текстиль өндүрүшүнөн күнүнө 80 тонна таштанды чыгат. Полигонго ошол акыр-чикирди өтө жогорку температурада өрттөп жок кылган жабдуу орнотулду. Абаны булгабайт, күл чыкпайт, түтүн да болбойт", — деди Шаршеев.
Ал таштандыны кайра иштеп чыгуу керектигин, бирок Кыргызстанда азырынча андай мүмкүнчүлүк жок экенин белгиледи.