БИШКЕК, 25-сен. — Sputnik. Уктап жатып эле ойгонбостон басып кетүү – бул сомнамбулизм абалы. Анын себептерин Sputnik радиосуна сомнолог Михаил Полуэктов айтып берди.
Адис уйку учурунда туруп кеткендер татаал кыймылдарды жасашы мүмкүн экендигин айтты. Ошондой эле сомнамбулизм абалы укумдан-тукумга өтөрүнө токтолду.
"Уйку учурунда басуу – мээге генден өтөт, адам бул учурда толук ойгонбойт. Мисалы, дельфин мээсинин чоң жарым шарларын улам-улам алмаштырып уктайт, себеби ага уйкуда да сүзүп, дем алуу керек. Ошондуктан ал уйкуга толук кире албайт. Мындай көрүнүш кээ бир канаттууларда, жаныбарларда бар. Айрым адамдарда дагы, айрыкча балдарда кездешет. Көбүнчө төрт жаштан башталат, себеби балдардын нерв системасы кубаттуу эмес. Бара-бара 14 жашка толгондо бул адат калып кетет. Чоң адамдарда сомнамбулизм аз кездешет", – деди Михаил Полуэктов.
Сомнолог уктап жатып басып кетүү айрым учурларды эске албаганда өтө кооптуу эмес экендигин белгиледи.
"Уйкуда жатып басып кеткендердин 99 пайызында кооптуу учур жаралган эмес. Айрым гана учурларда алар терезеге барып, андан өтүп кетүү үчүн түрткүлөп, ургулап, ал сынганда сыныктарынан жаракат алган учурлар болгон. Мындан тышкары, ачык турган терезеге келип отуруп алгандар катталган. Бирок көп учурларда алар басып, кайра төшөгүнө келип жатышат. Себеби уктап жатканда акылдын бир бөлүгү ойгоо болот. Уктап жатып басып кеткен адам кылмыш жасабайт", – деген Полуэктов.