БИШКЕК, 21-сен. — Sputnik. Кээ бир адамдар пенсияга чыкканда алгач эс алып, сүйүнүп, бирок убакыт өткөн соң көнүп калган жумушун, чөйрөсүндөгү адамдарын сагынып, кээде депрессияга кабылышы мүмкүн. Бул нерсени кантип алдын алууга болорун дарыгер Оксана Драпкина "Доктор Питер" басылмасындагы маегинде айтып берди.
Пенсияга чыккандан кийинки абалды кабыл алуу эмнеге оор келет?
"Жумуш аздыр-көптүр бизди коом менен байланыштырып, күндүн режимин түзүүгө өбөлгө болот. Адатка айланган бул нерселердин заматта жоголуп кетиши адамды түшүнүксүз, оор абалга салат", — деген Оксана Драпкина.
Анын айтымында, пенсияга жашыраак кезинде чыккандар (аскер кызматкерлери, өрт өчүргүчтөр) үчүн жашоону башка нукка буруп, жаңы нерсени баштап кетүү кыйынчылык жаратпайт. Бирок кары адамдарга бир топ оор болот.
Ошондой эле жашоонун ритми: мектептен университетке, андан жумушка өтүү этаптары дагы адамга дем, күч берет. Ал эми пенсияга чыккандан кийин мындай этаптын жоктугу адамга психикалык жактан терс таасирин тийгизет. Жакын адамдарын жоготуу, карылыкта коштолгон өнөкөт оорулар буга кошумча болуп, абалды курчутушу мүмкүн.
Андыктан дарыгер пенсияга чыккандан кийин адам өзүнө көбүрөөк кам көрүшү керектигин айтат. Эс алууга чыгууда сөзсүз түрдө жумуштан толугу менен кетпей, жумасына 2-3 күн иштей турган болуп сүйлөшүп алуу дагы адамды алаксытат. Мындан тышкары, жакшы көргөн иш менен алектенүү, жаңы адамдар менен таанышуу, спорт менен машыгуу дагы пенсионерди депрессияга кабылуудан коргой турганын кошумчалаган.