БИШКЕК, 21-сен. — Sputnik. Кытайлык ырчы Ван Фан курулуп жаткан Мариуполь театрында легендарлуу "Катюша" ырын аткарып жаткан видеосу эл аралык резонанс жаратканын Ukraina.ru жазды.
Ван Фан Россияга сентябрдын башында "Россия сегодня" медиагруппасынын Ukraina.ru басылмасы тарабынан уюштурулган кытайлык блогерлер делегациясынын курамында барган. Кытайлык ырчы Мариуполго болгон сапарында ырдаган "Катюшанын" видеосу көпчүлүктүн көңүлүн бурду.
"Москванын Кызыл аянтындагы парадда Кытайдын элдик боштондук армиясынын жоокерлери аткарган "Катюша" ыры биздин өлкөдө фашизмге каршы алдыңкы 10 ырдын катарына кирип, ушул күнгө чейин кытай элин шыктандырып келет", — деген Ван Фан Ukraina.ru басылмасындагы маегинде.
Бул тууралуу кабарды британиялык The Economist, The Telegraph жана BBC, америкалык CNN жана The New York post, ошондой эле бир катар башка Батыш ЖМКлары дагы жарыялашты.
Украинада да бул окуя көз жаздымда калган жок. Өлкөнүн Тышкы иштер министрлигинин расмий өкүлү Олег Николенко өзүнүн социалдык баракчасына кытай жарандарынын ДЭРге келишин айыптаган пост жазды.
"Украина Кытайдын аймактык бүтүндүгүн урматтайт жана Кытай тараптан Мариуполдо кытай жарандары кандай максатта жүргөнүн, ошондой эле алардын убактылуу оккупацияланган Украина шаарына кайсы жол менен киргенин түшүндүрүүнү күтөт", — деп жазган Николенко.
Украин дипломаты Кытай делегациясынын бардык мүчөлөрүнө Украинага кирүүгө тыюу салынарын билдирди. Ошого карабастан интернеттин украин сегментинде Ван Фан ырдаган видео 500 миңден ашык жолу көрүлдү.
Мариуполдон алынган видео Россияда жана Кытайда андан да көп болуп, 6 жана 100 миллиондон ашык жолу көрүлдү.
Ал эми украин тараптын нааразычылыгы тууралуу Ukraina.ru басылмасы уюштурган маалымат жыйында Ван Фан өзү билдирди.
"Кытай мыйзамдарына ылайык, биз кабыл алуучу өлкөнүн мыйзамдарын сыйлашыбыз керек. Эгер бизде Россиянын визасы болсо, каалаган аймакка бара алабыз. Украинанын суроолору болсо, анда Россиянын бийлиги менен такташып алсын. Ал эми Тайванга барган украиналыктарда Кытайдын визасы болгон эмес", — деген ал.
Кытайлык делегация ДЭР башчысынын милдетин аткаруучу Денис Пушилин менен жолугушту. Алар ошондой эле Крымга барып, ал жерде аймактын башчысы Сергей Аксенов менен да сүйлөштү.
Блогерлер бул сапарды уюштурган Ukraina.ru басылмасына ыраазычылык билдиришти.