БИШКЕК, 17-сен. — Sputnik. Түнкүсүн иштөө стресс, жүрөк-кан тамыр жана психикалык ооруларды, ошондой эле либидонун төмөндөшүн шартташы мүмкүн. Бул тууралуу дарыгер Иван Ромасов "Известия" басылмасына берген маегинде айтып берди.
"Уйку адамга күч топтоп, мээнин ишин толук калыбына келтирүү үчүн керек. 18 жаштан 64 жашка чейинки адамдарга 7-9 саат, ал эми 65 жаштан жогоркуларга 7-8 саат уктоо сунушталат. Түнкү уйку организмге эң зарыл нерсе", — деген Ромасов.
Анын айтымында, түнкүсүн иштөөнүн кемчилиги — уйкунун күндүз болгону. Себеби күндүз күндүн нуру көздүн фоторецепторлоруна тийип, андан мээге "ойгонуш керек" деген белги кетет. Мындан улам адамды сергек алып жүрчү гормондор бөлүнө баштайт. Адам тынч уктай албай же ойгоно албай, биоритми бузулат.
Мындай учурда көбүнчө кортизол, инсулин, лептин, мелатонин жана сератонин гормондорунун бөлүнүп чыгуусу жабыркайт.
"Күнү-түнү иштеген адамдар ден соолугун талкалап алат. Буга туура эмес тамактануу, узак, тынч уйкунун жетишсиздиги жана көбүнчө түнкү жумуштан келип чыккан стресс негиз болот", — деген адис.
Андыктан түнкүсүн иштөөгө аргасыз болгондорго күндүз болсо да уйкусун нормалдаштыруу, спорт менен машыгуу жана туура тамактануу сунушталат.