БИШКЕК, 16-сен. — Sputnik. Чүйдүн Токмок шарында “Кумтөр голд компани” ишканасынын дөңгөлөктөрдү кайра иштетип, желим жана башка буюмдарды чыгарган заводу тесттик режимде иштеп жатат. Бул тууралуу өкмөттүн маалымат кызматы билдирди.
“Калдыктарды акчага айлантуу” долбоорунун максаты — германиялык технологияны колдонуу менен дөңгөлөктөрдү кайра калыбына келтирүүчү ишкана түзүү. Эскирген дөңгөлөктөрдү алмаштырууга кеткен чыгымдарды азайтуу жана кирешенин жаңы булактарын түзүү аркылуу “Кумтөр Голд Компани” компаниясынын натыйжалуулугун жогорулатуу, калдыктардын зыяндуу таасирин азайтуу.
Маалым болгондой, завод учурда тесттик режимде иштеп жатат. Ушул жылдын аягында толук ишке киргизүү пландалууда. Учурда ал жерде 180ден ашуун адам жумуш менен камсыз болуп, саатына 2 тонна эски дөңгөлөк кайра иштетилет. Долбоорду жүзөгө ашырууга 19,2 миллион доллар жумшалган.
Иштин жүрүшү менен таанышып чыккан министрлер кабинетинин төрагасы Акылбек Жапаров кайра өндүрүлгөн товарлар Кыргызстандын өзүндө гана эмес, Казакстан, Өзбекстан жана Тажикстанга дагы сатыларын билдирген.
Мында эскирген дөңгөлөктөр кайра иштетилип жаңы продукцияга, тагыраагы, желимге, текстилге, пресстелген материалга айландырылат.
Долбоорго ылайык, 2026-2030-жылдары, тагыраагы, 5 жылда киреше салыгы орто эсеп менен 60 миллион сом болот деп болжолдонууда.