БИШКЕК, 16-сен. — Sputnik. Жекшембиде ак илбирсти сактоого багытталган Snow Leopard Run эл аралык жарым марафонго байланыштуу эртең менен Бишкектин негизги көчөлөрү жабылат. Бул тууралуу уюштуруучулар билдирди.
Маалыматка ылайык, саат 6:00дөн 11:00гө чейин жолдор тосулат. Бирок бир учурда баары жабылып калбайт, 7:20дан кийин бошогон көчөлөр четинен ачыла берет.
© Фото / Бюро коммуникаций ТАГС
Жабыла турган көчөлөр:
Чүй проспектиси — Манастан Абдрахманов көчөсүнө чейинки бөлүгү;
Абдрахманов көчөсү — Чүйдөн Иманалиевге чейин;
Иманалиев көчөсү — Абдрахмановдон Айтматов проспектисине чейин;
Масалиев көчөсү — Абдрахмановдон Айтматов проспектисине чейин;
Айтматов проспектиси — Иманалиев көчөсүнөн Чүй проспектисине чейин.
Аталган жарышта 5000ге чукул жөө күлүк 1, 5, 14 жана 21,1 чакырым аралыкка чуркайт. Ошондой эле жаш балдардын чуркоосу да пландалган. Старт жана финиш "Ала-Тоо" аянтында жайгашкан. Жарым марафонго түшкөн каражаттын бир бөлүгү кайрымдуулукка жумшалат.