БИШКЕК, 13-сен. — Sputnik. Былтыр ЕАЭБ менен Кытайдын ортосундагы товар жүгүртүү 30 пайызга өсүп, 200 млрд. доллардан ашты. Бул тууралуу ЕЭКтин антимонополия жана атаандаштыкты жөнгө салуу министри Бахыт Султанов Пекинде өткөн Адилеттүү атаандаштык боюнча эл аралык форумда сүйлөп жатканда айткан.
ЕЭКтин маалымат кызматы министрдин Кытай ЕАЭБдин бир канча мамлекеттери менен чектешкендиктен, биримдиктин маанилүү соода өнөктөштөрүнүн бири экендигине токтолгондугун белгиледи.
"2022-жылы ЕАЭБ менен Кытайдын товар жүгүртүүсү дээрлик 30 пайызга жогорулаган. Кытайга болгон экспорт болжол менен 40, ал эми импорт 20 пайызга өскөн. ЕАЭБ менен Кытайдын былтыркы өз ара соодасы 200 миллиард доллардан ашты. Мындан улам Евразиялык экономикалык комиссия менен Кытайдын ортосундагы атаандаштык тармагындагы кызматташууну өнүктүрүү өтө маанилүү", — деген Султанов.
ЕЭК министринин пикиринде, деглобализация жана регионализация шартында антимонополия боюнча мекемелердин атаандаштык саясатын өнүктүрүү багыты алмашып жатат. Көңүл борборуна аймактык интеграциялык бирикме көбүрөөк түшүүдө. Андан сырткары, санариптик рынокто таза атаандаштыкты колдоо боюнча ылайыктуу ыкмаларды издөө боюнча ыкчам жүргүзүлгөн иштер да уланууда.