БИШКЕК, 7-сен. — Sputnik. Президенттин жардамчысынан 300 миң доллар талап кылып, акчанын бир бөлүгүн алып жаткан жеринен А.Д.Б. аттуу жаран кармалганын УКМК билдирди.
Маалыматта А.Д.Б. Инвестицияларды илгерилетүү жана коргоо боюнча агенттиктин экс-директору экени айтылат.
"Аталган факт боюнча Кылмыш-жаза кодексинин "Пара талап кылуу" беренесинин негизинде иш козголгон. Тергөө учурунда А.Д.Б. ЖМКга чагымчыл материалдарды таратам деген опуза менен өлкө башчынын жардамчысынан 300 миң доллар талап кылган. 6-сентябрь күнү шектүү акчанын бир бөлүгүн алып жаткан жеринен колго түшүрүлдү", — деп айтылат кабарда.
А.Д.Б. УКМКнын убактылуу кармоочу жайына киргизилди. Тиешелүү айып тагылгандан кийин сот бөгөт чарасын аныктайт.