БИШКЕК, 4-сен. — Sputnik. Токмокто 17 жаштагы өспүрүм компьютердик клубда ойноп жатканда көз жумду. Бул тууралуу Чүй облустук ИИББ билдирди.
Маалыматка караганда, 1-сентябрда саат 23:30да 17 жаштагы Т.Б. компьютердик клубда ойноп жаткан.
"Өспүрүм эс-учун жоготуп койгон. Достору аны Чүй райондук ооруканага алып барышкан. Бирок ал реанимацияда үзүлгөн. Факт каттоого алынды. Баланын өлүмүнүн себебин аныктоо үчүн соттук-медициналык экспертиза дайындалды", — деп айтылат маалыматта.
Саламаттык сактоо министрлиги өспүрүм ооруканага жеткенге чейин эле үзүлгөнүн Sputnik агенттигине билдирди.
"Баланын сөөгү Чүй райондук жалпы дарыгердик практика борборуна алып келинген. Окуяны медиктер милицияга кабарлаган", — деди министрлик.
