БИШКЕК, 27-авг. — Sputnik. Жалал-Абад шаарынын борбордук көчөлөрү 29-август күнү жабылат. Бул туурасында Жол кыймылы коопсуздугун камсыздоо башкы башкармалыгы билдирди.
Маалыматка ылайык, Ленин көчөсү Ош — Бишкек трассасынын айланма жолунан тартып, Барпы, Сейил көчөсүнө чейинки бөлүгү эртең мененки саат 07:00дөн 12:00гө чейин толугу менен жабылат. Бул "Барселона" академиясынын ачылышына карата өтчү иш-чараларга байланыштуу.
"Урматтуу Жалал-Абад шаарынын тургундары жана коноктору, кырдаалды туура түшүнүү менен кабыл алууңуздарды суранабыз. Ошондой эле Ленин көчөсүнүн жээктерине автоунаа токтотпоону өтүнөбүз", — деп айтылат маалыматта.
Эске салсак, "Барсанын" легендарлуу мурдагы оюнчулары Роналдиньо, Карлес Пуйоль, Ривалдо жана башкалар август айынын соңунда Кыргызстанга келишет. Алар испаниялык клубдун Жалал-Абаддагы академиясынын ачылыш аземине катышат. Ушундай эле академиянын Бишкектеги имаратынын курулушуна капсула салуу пландалууда. Франшизаны жергиликтүү компания сатып алган. Анын алкагында "Барса" менен Борбор Азия легендаларынын жолдоштук беттеши уюштурулат.