БИШКЕК, 23-авг. — Sputnik. Мектепке чейинки даярдыктын туура жүрүшү бала үчүн эле эмес, ата-эне үчүн да чоң мааниге ээ. Бул тууралуу кенже класстын мугалими Екатерина Серикова Sputnik Кыргызстан радиосунун эфиринде сүйлөп жатып айтты.
Педагогдун пикиринде, мектепке баруу үчүн элементардык база жетиштүү, баланы ашкере кыйноо жарабайт.
"Бакчадагы мектепке даярдык балага баарлашуу үчүн керектүү көндүмдү берет, майда моториканы өнүктүрүп, санап, муундап окуганды үйрөтөт. Бул биринчи класска барган бала өзүн ыңгайлуу сезиши үчүн жетиштүү. Бирок мектепке чейинки даярдыкты ашыра жасап жибергендер бар, башкача айтканда, бала жаза алат, окуй алат, бирок анын баарын туура эмес жасайт. Мындай учурда мугалим кайра башынан баланы үйрөтүшү керек болот. Бул кыйла татаал процесс, ата-эне да, мугалим да кыйналат", — деди Серикова.
Окутуучу балдарга ата-эненин көңүл буруусу эмне үчүн зарыл экенин да түшүндүрүп берген.
"Ата-эне мектептен кийин бала менен отуруп алып сабак окушу зарыл эмес. Кайсы бир жерин көрсөтүп, айтып-деп, сүйлөп бергени жетиштүү. Бала ата-эненин көңүл буруусуна муктаж, ошону талап кылат, кечке жумушта болгондуктан көп-ата-эненин буга убактысы жок. Ата-эне азыраак болсо да сүйлөшүп, аркы-беркини сурап койсо бала ошого канааттанып, канат байлап калат. Демек, окуусу да жакшырат", — деп сөзүн жыйынтыктады педагог.