БИШКЕК, 19-авг. — Sputnik. Ат-Башы районунун Кара-Суу айылына караштуу "Шамбет" каналын реконструкциялоо иши башталды. Бул тууралуу аймактык кабарчы билдирди.
Маалым болгондой, жергиликтүү дыйкандар сугат суунун тартыштыгына байланыштуу көйгөйдү чечип берүүнү өтүнүп келишкен. Натыйжада министрлер кабинети 2022-жылдын декабрь айындагы чечимине ылайык, реконструкция иштерине 15 миллион сом бөлүнгөн.
Бүгүнкү күндө долбоордук-сметалык документтер аяктап, каналдын алгачкы жумуштары жасалып жатат. Каналды куруу ашар жолу менен пландаштырылып, анын сапатын көзөмөлдөө, тендердик ишин жүргүзүү, каржылоо Ат-Башы райондук суу чарба башкармалыгына милдеттендирилген. Ал эми жумушчу күчү Кара-Суу айылынын дыйкандарына бекитилип берилген. Учурда курулушка 40тан ашуун жумушчу тартылып, иш кызуу жүрүүдө.
"Шамбет" каналы буга чейин Кара-Суу айылынын 875 гектар жер аянтын сугарууга пландаштырылса, реконструкциялоодон кийин Кара-Суу жана Кара-Булуң айылдарынын сугат жерлерин камтып, сугат аянты 330 гектар аянтка кеңейтилет. Жыйынтыгында жалпы 1 205 гектар аянтты суу менен камсыздамакчы.